لاباس ياذيب قنب تالي الليل
لج العوى في ليل ماينسرى به
في راس عيطا للذيابه مداهيل
يقنب وتقنـب من قنيبه ذيابه
يكفيك ياسرحان شر المحابيل
كم ذيـب قبلك عض يمناه نابه
أدرى رفيقي وابن عمي عن القيل
وأعدهـم فـي المنـزلة لـي قرابـة
عندي لهم قـدر ومعزة وتبجيـل
محزم ظهر من دون شك وغرابه
يكبـر علي أرد في كيلهم كيـل
وأمـررر الــزلة لهـم بالنيـابــة
وأقيل عثـرات الرجال المشاكيل
حتى العتب من دونهم صك بابه
ماضي سلفهم لا تناخو على الخيل
يوم المراجـل في الجزيرة نهابـه
يذكر لنا التاريـخ عنهم تهاويـل
تشهد بها خـذف وتشهد شبابـه
سلم المسالم بالمواقف حلاحيل
ستـر العـذارى لابـة حـي لابـه
أهل البيوت العامرة والمداهيل
على النقا والطيـب عز ومهابه
إذا وقـف رجالهـم عـدل الميـل
دون الدخيل تقال فاقد صوابه
تضربهم دون الخوي في التماثيل
قصـة نويشـي يـوم قفـت ركابـه
ضحى بنفسه خوف لايلحقه قيل
وفك الخوي من كاس مـر شرابه