خلت الخيال اللي نشا من مناشيه
على جنوب الدار ووجه شمالي
عسى اوله بالليل يرجع لتاليه
والشمس تطلع ماحجبها خيالي
ماهو بمنوة حي عينه تراعيه
على بطون الاوديه والمفالي
منقول سيله ونحرف عن مجاريه
كبير لكن دون طيبه جبالي
اليا صتدم فيها ترده لواديه
ماترجع الاوتاد جرفٍ هيالي
العقل ياحيه وياحيه طاريه
وسد المثالم والطريق العدالي
الشخصنه مابين مشني وشانيه
تعميمها عند العوارف خمالي
اليا بغى الرجال خصمه يناديه
باسمه لايصفق بالدلو كل جالي
حرب النيابه خلف ساتر وتمويه
وهذا بدل هذا وهذا بدالي
الحر لو يعطا بها مال يغنيه
ماله ومال قصارها والطوالي
حميةٍ فيها مقاصد وتشويه
لابد ماعنها يميل الضلالي
نبش القبور الباليه مالكم فيه
ونتم رجال ومن سلالة رجالي
ادعو لهم علام جهره وخافيه
اخير وبرك من كثير الجدالي
بدال هذا فيه هذا مايخطيه
بعض الكلام بحقهم مايقالي
العلم يبغاله رجاجيل تنهيه
مافيه لامكسب والا راس مالي
اقصد جميع مشورب ٍ
الامر يعنه
حطو بها قدام تسري عقالي
لنا مشريه وعلينا مشاريه
وتبادلين الطيب ماضي وتالي
وانساب يفخر بالناخي بناخيه
وجيره وخوه من قديم اليالي
الصف واحد والتلاحم نحييه
والعقل راس المعرفه والكمالي
اللي يخصه ماذكرته ويعنيه
عليه حل المشكله والشكالي
لايعطي الموضوع مقرن علابيه
ويصل المرض كبد الجمل والطحالي
من تاه يلقاله عوارف تقديه
والخير بالامه ليوم السوالي
الطيب باهل الطيب تضهر مواريه
مع نايد العربان والا موالي
ماهو بحصريٍ على حيه تغليه
عدٍ مشرع لنشاما زلالي
به من شرب من جم نبعه وصافيه
وبه من عنه رده قصير الحبالي
لبيه ياصوت العقل ثم لبيه
ياحي فاله ثم ياحي فالي
فيه الحكيم الذرب يوصي ذراريه
ويخطيه بالصعبه سريع انفعالي
الذيب يعرف وين وجهة مساريه
ويعرف متى يرقب على راس عالي
بين السباع السبع تعرف مواطيه
الغيرها من شافها ماتحالي
هذا الصحيح اللي سلم فكر راعيه
شاعر وجاله بالمعاني مجالي