كم قلت لك ياسعد الحظ لاتغريك دنياك
ماباقي الا عظيم الشأن علام السريره
تعطيك فرصه وتضحك لك ولا تجهل نواياك
ويشيع ذكرك مع العربان من ديره لديره
تسرح وتمرح على ماجاز لك يضحك محياك
لو كان حالك مع الايام ماتعرف مصيره
ياكم وصل منزلك مخلوق شاهد شوف عيناك
روح ماخذ من عطا دنياه لو حبة شعيره
احرص على الخير لأجل الله بفعل الخير يجزاك
تمشي وكل على الدنيا يعرف الله مسيره
ياما عطتني سنين العمر من مثلك وشرواك
احباب وأصحاب وايام فوايدها كثيره
لكن مادام لي منها سوى ذكرا لذكراك
وانا حنيني على الماضي مشاريهه كثيره
لولاك ياصاحبي ماقلت هذا القول لولاك
لكن خذ مايفيدك كان بك بصر وبصيره
(الشاكر ابو سامي) حميد اللقماني