المشاركة الأصلية كتبت بواسطة زيد بن مبشر الحصني الحربي

كم مرةٍ وحيت لو ماتوحيت=من مصدر ماينسب العلم منقول
علم قصى صبري وأنا ماتقصيت=وعودت مما شفت وأوحيت مذهول
لأم السمع وإم البصر ماستقريت=شفت وسمعت وقلت ماهو بمعقول
بحال أقول يصير وبحال عييت=لاشك باللي عن هل الشك مكفول
واثق وباني بالحشا للثقه بيت=بيتٍ مشرع مدخله مهو مقفول
لاهل الوفا يأذن ويابا الشحاتيت=بكف عن مصافح هل الشك مغسول
العام أماري واتعزوى بحليت=واليوم أشوفه من هل الشك مدخول
يفوح من جوفه مثل عادم الزيت=تسربت عدوى الجهاهيل لكهول
بعض السوالف مثل ضرب الدناميت=يجيلها مع طول الأيام مفعول
باللي سموعه للسوالف مصانيت=ويحلل المفهوم تحليل مجهول
وأنا الحقيقه من سؤاله تفاجيت=ليت السؤال بمنطق العقل مقبول
ماني وكيل آدم على الحي والميت=ألا على نفسي مكلف ومسؤول
واقبل من العاقل نصيحه اليا أخطيت=للاحظ العاقل خطأ ويش ابقول
واشور من شرواه لدلابه أصغيت=ماقول عرفي كامل العرض والطول
واللي يجاملني خطأ اقول غشيت=مار انتبه مما وقع فيه زهلول
لو بالمجامل يكتسون المصاليت=قد قيل ياحاتم لبو كف مغلول
واللي حسب لي عكس الاقبال لاقفيت=حسبته شتله من ذراع مشلول
ماقول له نافع ولا أقول ضريت=والرجل لولا جوهر العقل مخيول
وإن شفتها جات مجهمه سقتها لـ(هيت)=أقول عدوها ترى العد منزول
ماأقبل من أهل العوج عوجا ولاأهديت=والرجل منطوقه لخافيه مدلول
ولاأبيع وأشري في مزاد الشماميت=وسيفي لضرب اعضاي ماهو بمسلول
وبيدي ادافع دون حلقي إذا بليت=ولا جاري المبدول وأصير مبدول
لآمدها بالمهزله ماتماديت=أزعل وأضيق بحال وبحال بهلول
وإن وجهت يمي على غير توقيت=دفنتها بالسابعه دفن مقتول
في حال ولا بحال لي ماتوريت=للي بقلبه ريب والنطق معسول
ليا أفطرت عن هزل المعاني تساميت=وكم لي وأنا صايم من الحول للحول
والشك والريبه عمولة مباحيت=والشعر له شعار نقاد وفحول
ولا أقول أنا حاتم ولا معزب سبيت=يوم الزمان زهيد والرزق مقلول
اطلب من الله كل ماصبحت وأمسيت=احظى بحسن الظن بالفعل والقول