ياقلب ياقلب العنا والهواجيس
نفسي هواجيسك تبيح خفاها
يمكن تعانق طايرات القراطيس
في ليلتن من صبح ثاير هواها
لو ماتعوذ كل ساعه من ابليس
والنفس بلذات متبع رضاها
لكن تذكرني ليالي مراميس
وسهرت عيني وانتثر غصب ماها
في جفنها باليل مثل الدبابيس
عن نومها بالليل ناهي نهاها
انشدك وين محرقين المحاميس
اللي ينشط كل طرقي نباها
نيرانهم تنشاف وقت الغطاليس
لاشافها هتاش ليله نصاها
مايملكون المال دايم مفاليس
وكرام في لين السنين وقساها
خلف الضعون يبعدون المراميس
مع نجد جعل النو يسقي ثراها
وانا صغير اخذت معهم مراويس
وكم راس مزمومه رقيت ابحجاها
مرتاح في دنياي لو خالي الكيس
وان نمت عيني نومها ماجفاها
واليوم ترهقني كثير الكوابيس
شايب ونفسي ماتحقق مناها
عجاب صالح الحنتمي