ياعلي دوك الوجار اشعل حرايقها = خل المسير من اقصى الحي يرعيها
وازهم اسامة يدني لك لحايقها= دلة ومحماس مع نجر يباريها
خلو معاميلها دايم تعانقها = ياما حلاشبة وانتم حواليها
شفي على قهوة حلوة ذوايقها = مهيلة وانت بيمينك مسويها
يازين فنجالها واخوك سايقها= على مشاكيل شاقتني معانيها
في جلسة طيبها غطى عوايقها = ماشابها شايب يخلف طواريها
اليا بغيت العلوم اعطوك صادقها = تسعد بمنطوقها من يوم توحيها
تغنيك عن ناس تاهت في طرايقها = مضرة الناس دايم من مباديها
من عاش مع علة ماهو مفارقها = حتى الطبيب المداوي مايداويها
لو يبدي الطيبة ماهو بطايقها = حبايل السوء جوف القلب كانيها
مخايل في السما لاحت بوارقها = لكن رش المطر مابل واديها
سود الليالي غدت باللي موافقها = والمقمرة زان للساري مساريها
جانب خبول البشر واختا ر رابقها = من عاشر القوم يمسي فيه مافيها
الرفقة الطيبة دايم ترافقها = ان جات وان روحت وانك مخاويها
هذي وصلتي تمعن في حقايقها = وضحت مضمونها ماني مخفيها
واختم واصلي صلاة وانت عاشقها = على النبي واله الاطهار نهديها