يا ليل يا ليل يا ليل العنى والسهر
ما ترحم اللي عيونه ليلها ساهرة
ملت من البر ملت من شواطي البحر
تراقب انجوم في جوف السما ظاهرة
وانته تعرف النظر ما يفيد كثر النظر
يغيب نجم السماء في الليله الماطرة
واليوم يا ليل جا للعلم بطن وظهر
والصمت فاللي نشوفه يحسب مخاشرة
ماني مصدق بشر تاكل لحوم البشر
واثر الخطر منتشر فالبدو والحاضرة
هذاك يبني جدر هذاك يهدم جدر
والحق امسى صعيب ودربه مخاطرة
وامسيت يا زيد ما همك فعايل عمر
خلاص ما فيه لاخوة ولا مناصرة
والعاقل اللي عطاه الله فكر وبصر
قدامة الوضع صوت وصورة مباشرة
وراه في فنهاية المشوار رحلة سفر
يبغالها جد فالاعمال ومثابرة
وفختامها لحد له ينشق داخل قبر
ذي مرحلة تنتهي ويرد للحافرة
مسكين مسكين ياللي مغتنمت العمر
في طاعة الله لجل الفوز بالاخرة
قطفت لك من حقول الشعر احلى الثمر
يا تنكتب وحدة يا تكتب العاشرة
وانكان فالقول جا تقصير جاك العذر
افكاري امست من الاوضاع متناثرة
فأيمن الدرب نار وفاليسار الجمر
يالله يالله تسلمنا الخطا العاثرة
وتغفر لنا اذنوبنا يا رب حنا بشر
افكارنا احيان منا توخذ مصادرة