يا بحر جدة جيت مرغم لِـ شاطيك
متضايق الخاطر وجيتك بسليه

عينٍ على أمواجك وعينٍ تراعيك
وفكري على مدّ النظر قمت تغريه

كثير ناسٍ في مواقفك تطريك
وانا جبل همي رقيته لعاليه

باقض منه شوي في شوي وأبيك
في داخل أعماقك عن الصدر تخفيه

جيتك وانا عما طرأ بي بحكّيك
لو رحت عنك وخاطري باقٍ فيه

غدار وأدري بك ولا جيت اناجيك
ناجيت ربي والعوض منه راجيه

إن كان فيما قلت يابحر يمديك
تقدر على حملي وجرحي تداويه

قال البحر لك ربك يالعبد ينجيك
ويشرح لك الخاطر وحالك يسويه

انا عليّ حمول بأمره ولا أخفيك
مخلوق طايع لامر ربي ولاعصيه

وانت البنادم كل ما إبليس يغويك
تذنب وتستغفر لذنبك ويعفيه

باب الفرج بالصبر همك ينسيك
ولك رب يقبل كل ما اقبلت تدعيه