اخر قصيده توها مابعد جات = وعن الجديد اقول هذى قصيده
لو القديمه بالزمن بعض الاوقات = قامت تجدد في عيوني جديده
ودي ابين موقفي وقت الابيات = بحرن تلاطم والعواصف شديده
عسفت مهره فى فنون المهارات = شقرا عنيده من خيولن عنيده
عسفتها تجتاز بحر المتاهات = تنهج مناهج والادب ماتحيده
مثل النجوم تسير عبر المسارات = ومثل الكواكب في سماها فريده
على شعاع الشمس علم البطولات = ماهي علوم اهل العقول البليده
بعد النظر يطوي طويل المسافات = اقنع بشور اهل العقول الرشيده
جربت بالدنيا عديد المجالات = هقوات روحي عزم قلبي تزيده
ماهمني دون الهوى قول شمات = الود وسط القلب ضد وضديده
الفكر لو مس الهوى بس مسات = الفكر ضد الود ماهو عضيده
ضاع الغلا مابين ريبه وشكات = امسى يريده والضحى مايريده
هب الهوى والقلب مرفوع رايات = الود سيد القلب ياناس سيده
قلبي تقسم بين همسه ونظرات = الصبر مر ونار شوقي وقيده
ذات الرموش الناعسه والضليلات=لاسلهمت قلب المشقى تصيده
ترجمت بالعينين سرد الحكيات=وفيهن قريت الحب جمله مفيده
نبضات هم القلب بالشعر ونات=وفي قلبي الاحزان داخل وريده
طعم الفرح قافيه بالوقت لوعات=الفايده بالوقت فرصه زهيده
مرباع قاف الشعر بربوع جزلات=وشفي على در البحور المديده
كان المشاعر صادقه بالرويات=نادر وجود اللي تسمى وحيده