يابديع الوصايف يالمليح الفتون = ياخشير الشهد والزين فيكم سمه
شوف مضناك صابه من جمالك جنون = يسهر الليل كله والعرب نايمه
لايمي فيه ،، فيني من جنوني فنون = جعل يفدا عيونه فني ولايمه
لاتعثكل جديله فوق هاك المتون = زي ليله على خد الضحى ,, تلثمه
وان مشى باشة الغزلان مشيه بهون = مثل مر السحابه في سما غايمه
البلا في خدود تحت ذيك العيون = والخشم سيف ,, بس الموت في مبسمه
اه لولا الملام وهرج من يهرجون = لاخطفه لو وراه جيوش متليمه
واجعله عين ,, واغمض عليه الجفون = وان عصاني لساني ,, قلبي يكلمه
واكتبه حرف واغنيه وجد ولحون = واسكنه دار بين القلب والجمجمه
خـــالد الحـــربي