ياللي تبا الاخبار جيتك بالاخبار=خذها من اللي عاشقٍ للجزالي
بعض الشيوخ شيوخ درهم ودينار=وبعض الشيوخ شيوخ قول وفعالي
شيخٍ خذا شيخته من داخل الدار=وشيخٍ خذا شيخة بليا ظلالي
الاول اللي لاغزا ياخذ الثار=والثاني اللي لاغزا عاد خالي
وقتٍ به الافكار تعجز وتحتار=بين الجنوب وبين حد الشمالي
ليت الزمان يعود ونعود صغار=مير الزمان اقبال ماهو بتالي
وياصقر قرب واستمع واشعل النار=يالصاحب اللي نحسبه راس مالي
قندتلك دله بها بن وبهار=وانت من اللي يحتمون التوالي
ليلٍ فرحنا فيه في سر واجهار=لولاه ماجاله من الناس غالي
اشره على الصاحب وما شره على الجار=مادام وان الجار رد السؤالي
اللي مضى مابيننا ياصقر طار=والحمل شدة به ظهور الجمالي
واللي يجي يعلم به الواحد البار=الواحد اللي يعلم بكل حالي
بعض الخطا ماينقبل فيه الاعذار=وبعض الخطا يبقا لعذرة مجالي