ابن عمك ما معك الا ابن عمك
لاتـنـزّل قــيـمـتـه و لا مـقـامـه

محزمك وقت اللقا لحمك ودمك
لاتقـلل من مـكـانه واحـتـرامـه

شيل همه حتى لو ماشال همك
وفالظروف القاسيه خلك حزامه

جـامـلـه ولا تــذمّـه لـو يـذمـك
خلك اكبر منه واكبر من كلامه

وكان كثّر في كلامه لا يهمك
بكره بـيندم وتـاكـلـه الـندامه

لاتبـيّـن له كـثـر هـمك وغـمـك
جامله في ضحكةٍ والا ابتسامه

وكان حدّته الظروف وراح يمك
خل وقفاتك معه طيب وقرامه

هو سندك وسيف يمناك ومعمّك
فالنهار الشين ماتبرد عظامه

فزعته لامّن جار الوقت ضمّك
تاخذك من جور وقتك بالسلامه

ابن عمك لا تردى فابن عمك
والسلام نهاية القاف وختامه

فهد خالد العياضي