الجهل في بعض المواقيف خيره
لا من رماك الصاحب اللي توده
ودك سلاحك خالي من الذخيره
من شان عيب انك بوجهه تمده
وودك على الاجناب راعي بصيره
وترد كيد اللي نوالك بضده
وانا من الاول جروحي مريره
واروف به وابطي ولا اصير نده
إليا جرحته عشت في زمهريره
وسيفن على ربعي محالن احده
لكن فالثاني حظوظي كبيره
والنصر بإذن الله بصفي مرده
ماني حفيد اللي شبوره قصيره
وعندي على عسرات الايام شده
انا وريث اهل السيوف الشطيره
وتاريخنا كل النشاما تعده
من روس قومن لصداقه جبيره
وحريبهم يقفي ووسمه بخده