اهدا للشيخ فرج فخري الفريدي بمناسبه فوزه بالمركز الاول بمزاين ام رقيبه بمنقية الحمر اربعين
ماهو غريب اليوم لو يعلن اليوم
علم يسليني ويجلي اهمومي
باسم الامير اللي له الامر مختوم
من عاصمتنا بالقرار الحكومي
علم يخلي بارد الوجه ملطوم
لايفرحون مدورين العلومي
يضحك بناب يلدغ الناس مسموم
منبع ردا معه الوفاء مايدومي
وانا اترفع عن خطاء الناس واشوم
ابعدت عن حوم الشبابيط حومي
ماني بما يصدر من الناس ملزوم
مادام يفسد لاتكلمت صومي
وان شفت ماني لاتكلمت مفهوم
مثايلي رديتها في كمومي
واضغاث نومي عندما اصحي من النوم
ما اهذها لمفسرين الحلومي
واليا مشيت بليل دامس ومنجوم
اعرف منازل ثابتات النجومي
الجدي مامثله مشابه ولاتوم
مثله مثل رجال من بين قومي
رجال عرف وبالمواقيف زيزوم
يرسي على بعد النظر والعزومي
يمشي فرج فخري على نهج وسلوم
هيف السمين المثقله بالشحومي
بيته كبير وللرياجيل معلوم
مدهال طلقين الشوارب عمومي
اليا نزل ينزل على راس مزموم
تقل ان بيته للمسايير يومي
وان صار بالميدان ترتيب ورقوم
يوم التنافس بالمراكز حدومي
يقبل بحمر فوقها الني مردوم
تلمع مثل نور الشفق بالغيومي
لادرهمت جيش ورى باشة الروم
ماتختلف عن بعضها بالرسومي
ترتيبها من بين الاذواد محسوم
تريحوا ياطيبين الخشومي
كلن ورى ذوده مقدر ومحشوم
الجايزه والفوز مثل السهومي
نايف بن مياس