مساكم الله بالخير والرضى


اخر ماجادت به القريحه ولم يرى النور



يانعنبوا وجه جحدني وانا حي
وجاب العلوم الخايبات القبيحه
يومه تنكر لي وحط الردى في
ماقال صدق ولاهرج بالصحيحه
في نفسه القشرا سكاكين وعصي
وفي جثته مليون جيفه وريحه
مايعترف بالطيب لو كانه شوي
ولايسمع التوجيه والا النصيحة
عليه من فعله علامات وكوي
وخبث يسوقه للعرب في مديحه
ان شفت هرجه قلت حاتم ولد طي
وان شفت فعله قلت ماله شريحه
لابيض الله وجهه الخايب السي
ولا بارك الله في مداه ومطيحه
اقبل يقلبها وهو مامعه شي
واقفى ونفسه بالخطأ مستريحه
ان قلت مخطي ماسمعها ولاحي
واليا ضربته قالوا اكبر فضيحه
وانا من الثنتين ماتقرب ايدي
لان النوايا في ضميري صريحه
والله يالولا العرف والناس ووخي
لاقول قول مايتداوى جريحه



عبدالعزيز مناور الرويثي الحربي