.
.
سبحانه اللي ثبت الارض باوتاد
عبده عليه انابته واعتماده
وموحدينه بالعباده والافراد
ماغيره المعبود نشهد شهاده
وان القدر ماله من الخلق رداد
وبابه بليا واسطه من عباده
يفرج لمن نومه على كوع وشداد
حتى ضلام الليل يفهق سواده
وانا مع الهاجوس صادر وميراد
مبطين عن جو الهناء والسعاده
حزني معي يملك شهاده وميلاد
اسبق علي من الاصيله جواده
لوعات وقتي صامله يا ابن عياد*
ماهي بلحية تجربه واستفاده
والمجتهد يضنيه حمله بالاجهاد
لو به صفات المرجله والقياده
والناس ماتلقى بها عضد وسناد
ولاعندهم للراي حق وحياده
اقسامهم نمام دجال حساد
حتى الرواعي تفتخر بالعماده
والزير ماهو عنتره نسل شداد
ماصد عنتر سابقه عن مراده
نايف بن مياس الفريدي