يامل قلب داهمته الطواري
تورد على حبل الوريد وتزره
انام ليلي وابتلش في نهاري
الصيف حل وحل لاهوب حره
ورجلي معودها لسج البراري
ماني من اللي مايعدي مقره
انا هواي ولذتي بالصحاري
القا بها لاضاق صدري مسره
وانا ليا شبيت بالبر ناري
واخذت في ماقع الصيد فره
في خايع مدهال برق الحباري
تلقا لها مع طلعة الشمس جره
وهديت لي حر ع الصيد ضاري
ذنبه على الخرب المقفي وشره
ايحوله عن مايرومه اجباري
وان طب كوبر مايروح ويمره
طلعه ثبات وبالهجوم انتحاري
فعله ينومس من قناه ويسره
اقوم قبل الغطلسه والغداري
ماغير انا والطير لاذقت حره
واسري ولاتصعب علي المساري
ياما وطيت بضلمه الليل بره
هذا هواي وغايتي واختياري
يلومني خبل ن علي ايتشره
وانا امتلك شرعيتي في قراري
والناس في ماتطلب النفس حره
مالي علاقه بالمجال التجاري
مالي مع اهل السوق مثقال ذره
يعزني عن كل قاصي وقاري
ولاراجي ن من داني الناس بره
بالبر لوتذري علي الذواري
لو كان صلفات الهبايب تعره
نايف بن مياس الفريدي