يارمز الغلا والحب ياغلى المخاليق= يابهجة نظر عيني وشمعة ضياها
عيوني على شوفة عيونك مشافيق= ماغيرك من الخلان يروي ضماها
تجوع لوصالك جوع ياحالي الريق= تغذّى بنظره من عيونك غذاها
اغيب بعيونك لحظة القاك وأفيق = ولمّا تغيب العين تفقد كراها
لاتبطي تراي لقاسي البعد ماطيق = كرهته مثل كره العيون لعماها
دياجير بعدك تجلب الهم والضيق= تغطي على شمس الوناسه سماها
عناها علي اثقل من النير وطويق = ولو كان قلبي من حجر ماقواها
تمر الثواني مثل مشي البطاريق = على خاطري ياثقل ممشى خطاها
ماغير اتسلى في لحون الطواريق= وامني معاطيب الجروح بدواها
الا ياغلا مابه تصنع وتلفيق= كنوز الجواهر معه يرخص غلاها
مقامك علا سطح النجوم الشواهيق= وحبك سكن بين الضلوع وحشاها