منشا سحاب الشعر من غب الاعماق = وتياره الساخن يزيده كثافه
وليا تكثف وجّه حروفه وساق = ونسيمه يسابق مواقيع قافه
يعزل سموم الود عن حر الاشواق= بين الطمع والود فرق ومسافه
ترجف رعوده كل مالاح براق = وتخيله عيون الطمع والمخافه
خطير في ضوحه على بعض الاحداق = منها شعاع النور خطر انخطافه
وان هل هماله على بيض الاوراق = اسقى ورق عشب الامل عن جفافه
لاني بمتفلسف ولاني بسراق = ولا اكتب ولا افرا في طلاسم خرافه
خاطب معاني شعر واعطيت مصداق = ودافع مهرها من جنيه الصرافه
وعلى سمي اللي على الماد سباق = نسل الحصان وفي لسانه حصافه
شاعر واديب لراقي العلم ذواق = وموصوف منطوقه بحسن اتصافه
عليه من بعد الولي بعض الاوفاق = وتقريب وجهات النظر باختلافه
وقفت من شانه على ركبه وساق = من دون شك وريب مامن كلافه
والعلم غلفته بما ناسب ولاق = عن نظرة عيون الحسد واللقافه
ولابد ماتاصل قوافلك ياعراق = ان كان ماحطمت جسر الرصافه