الاخوه الاعضاء هذه قصيده ارجو ان تحوز على رضاكم
الشعر فيه سمان مابه مناقيد = وفيه الجزال وفيه جزل البريره
وفيه الهزال اللي مايوجدبه الفيد = وفيه العجاف وفيه غيره وغيره
والناس كلن له مذاقه ومايريد= حسب المزاج وحسب مبدا ضميره
نرفع نظرنا فوق في عالي الحيد= عن نظرة البايق مانتبع نظيره
اليا تبعنا طايح الهرج بالسيد = انطيح مع من طاح طيحه مريره
للشعر بيت وينبني بالعواميد = وللجود بيت وكلمة الخير خيره
واللي يذر الملح ملح الاجاويد = في مامضى جا من شمال الجزيره
وعم القبايل كلها دون تحديد = اللي على دربه وممشى مسيره
حتى تعدا دار فكاكة القيد = اهل الفعايل والبخوت الكبيره
واليا ان ماباقي معه زايد يزيد= اللي بقى معاه نزر ونزيره
ومع الهوا نثربه بصفحة البيد = واصاب منهو صاب واخطى نثيره
مضرب مثل يذكر وينعاد ترديد= على الكرم عند العقول البصيره
وعلمن تثبته الوقايع بتوكيد= ماهي علوم مبيحين السريره
ماهي مقالة زيد وفهيد وعبيد = هذي مقالة شيخ قاد المسيره
مجده تعلا هامة المجد تمجيد= بالطيب وحدود السيوف الشطيره
من راس عيطا حاميتها الصناديد =قمة مواكير الحرار الشهيره
قمة جبل عالي رفيع المواريد= فوق السحب تحت النجوم المنيره
في وقت حرب الترك حمر الاخاديد = جاته جموع الترك تزحف غفيره
وبالملح الاشهب مع رصاص البواريد=اعطاهم النار اللهيب السعيره
وجموعهم راحت مثل شرد الصيد =راحت جميع جيوشهم مستذيره
وان قيل عطنا للدلايل شواهيد = اقول حاضر والدلايل كثيره
يثبتلك اللي يعرفون المقاصيد = من راوي وشاعر لسانه سفيره