زمنا زمنا فيه فارق عن الازمان = ياكثر العجايب فيه والخير ياكثره
عجايب زمن من واقع يشوفه الانسان = ومقاسيم خيره قسم من والي القدره
ولولا الحسد مايحبس القطر بالامزان = تجيك المزون الغر بالوبل منهمره
وتمطر على دارن بها يدعي الضميان = وربك له بتدبير كل الملا دبره
وعلم الصواب يصيب مايخطي النيشان = وعلم الخطا يخطيك ياصايب النظره
الا يابعيد الشوح في نظرة الاعيان = تراحيب بيت الجود تعبير عن قدره
ليا صار قول الحق عادة رفيع الشان = بنادم ماقال الحق لاعاد تعتبره
تجيك النصيحه من نصوح وكريم ايمان = وتجيك الخطيه من ردي شايل الكبره
اقول الصحيح بكلمتي واللسان حصان = عسى الله ياقالي حصاني من العثره
ترى الطيب بحسن الملافظ معاك يبان = كلامه يبان ولاهو بهابطن سعره
بيوت الشرف والعز تبنى على العمدان = وبيوت المذله تربط بغصن من شجره