ليه السماء مافيه سحب(ن) ولا غيوم
ليه السماء مافيه حتى غمامه

ليه السماء مافيه بـدر(ن) ولا نجـوم
ليه السماء قام يتزايد جـهـامه

ليه النظر يم السماء يـبـطي الحـوم
طال السهر والعين عافت منامه

يامن يـخـبـرني قـبـل يأتـي الصــوم
والا تـرا الصـايم يـتـمـم صيامه

يامن يساعــدني عـلى جـمـلـة عـلـوم
وجه الشبه مابين غراب وحمامه

وجـه الشـبـه مابـين الـمـوت والـنـوم
وجه الشـبه مابين جيد ورخامه

وجه الـشـبه مابين مـعـطى ومحـروم
وجه الشبه مابين نور وظلامه


وجـه الـشـبه مابين تـريـاق وسـمـوم
وجه الشبه مابين ذل وكرامه

من خـلـقـت الدنـيـا الى يـومـنا الـيـوم
ومن يـومـنا هـذا لـيوم القيامه

ماظلت دنــيــا عـلـى وضــعـهـا دوم
دنــيـا تـخـالط حـلها مع حرامه

ليا صرت يا السباح ماتعرف الـعـوم
خلك على الشاطىء وتجني سلامه

لا صرت يالخيال ماتـنـطـح الـقــوم
ألزم حصانك وأحـتـفـظ فى لجـامه
........................................