سلامي على خالد سلام ن على الناموس=من الهاجس الحربي وحربي على القيفان
انا ما اقبل المنكوس واغني بالمنكوس=يكود الليالي تعدل المايل الفتان
ولاياعميل الخير أنا بشكي خمس احسوس=توردني اعدودن تضاعف ظما الظميان
ليا شفت مزن الخير يفرح به المغروس=أخيل البوارق واجني الورد والريحان
ولا اقرب من الداني لياكان له ممسوس =انا شاقني الفارع على ميلة الأغصان
ولكنّ ما فالوقت ضامن على المحسوس=صروف الدهر تسبق طوير ن خفق جنحان
تجرعت مر الصبر والحنضل المهروس=وبعض المرار علاج يبري ضنا السقمان
دوايا ودائي طرف ريم الفلا المنعوس=ولكن غاب الريم وأمسيت كالسرحان
يجر القنيب أو كان مثل الذي مضروس=ولاعاد عنده فارق الليل والتبيان
بعد واقع ن عشته غدا حلم دون اعسوس=تساوت ليال الأنس باللي كستها أحزان
تعلمت من وهم المودات ست ادروس=سقى السبخ وضرب الميت ونشدة الصمان
ولعب السراب وحمس بن ن غدا محموس=وشرب ن من المالح يزيد ابردا العطشان
وغيره وغيره حب مامون عند السوس=تفكر ياخالد وارسل الراي بالألحان
يقوله عريب الجد والخال صم الروس=وصلي على احمد خاتم الرسل ابن عدنان