البارحه جفني عن النوم مصدوف=بين المرامش مثل شوك الكداده
من واهجٍ بين المعاليق والجوف=عن جمره الغربي تطيّر رماده
على وليفٍ دونه الباب مدروف=حسبي على اللّي حيّره عن مراده
ادعج غنج والبطن ضامر وملهوف=كن الغظي ممنوع شربه وزاده
عن جملة الخفرات عندي بها نوف=عين اشقرٍ مربوط قرّب هداده
والعق عنق امذيّرٍ شاف له شوف=زولٍ لمح له بين عرق وحماده
وجدي عليها وجد من شيل مكتوف=واصبح سجين وشاف ظلم الأفاده
صدّر قراره ظلم وعيونه اتشوف=قالو قصاص ولقّونه الشهاده
مومن صحيح ولادخل قلبه الخوف=والسيف ضك ولاظهر من اغماده
وصاحت اجموع الناس طوفٍ ورا طوف=وجاه الطليب وفك ربطة اقياده
موقف يهز اشعور من حوله اوقوف=الله كتب له طول عمر وسعاده
الله يجيب مغيزل العين مزفوف=واحط عضدي حدر خده وساده
باالسنه السمحه امساكنٍ بمعروف=سنّه بها المعبود حافظ عباده