المشاركة الأصلية كتبت بواسطة محمدسماح الغيداني

هات القلم و أدن المعاميل يا عبيد = باللي يحيك الصدر منته بداري
قلط لنا الرسلان جنب البغاديد = حيثك بحكم البن فني و أداري
من يوم طار النوم مابه مقاعيد = السالفة ماهي سوالف مجاري
حتميتن ما عاد عنها مصاديد = تبي ارجالن ياصلون المحاري
يا مرحبا باللي معانيه تحديد = يشوفهن ما قصهن بالأثاري
حرن على مشهاته يهد و يصيد = ما يذبح إلا من اسمان الحباري
طلال وجه لي رسالة و تمجيد = و اختار لي غازي خوين امباري
نصيتها هداج في كل ما تريد = عد الروا ماهو سراب البراري
غازي بعيدن عن دروب المناقيد = في خوته لي الشرف و افتخاري
لو كان ما بينت بعض الشواهيد = توهتني بين الجبل و الصحاري
بين الطواري مخلفات المواعيد = لو اعتذر صعبن علي اعتذاري
مالك و مال اهل الحسد و اهل الكيد = ما عندهم غير الدجل و المزاري
اللي سوالفهم من بعيد لبعيد = ارجال السعه ما ياصلون الخطاري
الرجل ما يهمه كلام الرعاديد = علمن يمين و علم حطه يساري
ما دمت من ربعي ارجال المعابيد = زبن المخيف اليا جرت له جواري
ليا ولعت بين الرجال المعانيد = يجذب سناها بالدجى كل ساري
حريبهم يشرب من المر و يزيد = يخضع لهم بالطوع و إلا اجباري
قلته و أنا ما أردد الهرج ترديد = آخذ من الصافي و أخل الهذاري
أنطح سناهن كان جني مواريد = و أقطف ثمرهن زين حسب اختياري
و المعذرة يا مصخرين الشواريد = ياللي لكم بالشعر حكمن وزاري
اختامها في ذكر من له سواجيد = جميع خلقه و النجوم السواري
و صلوا على من جدد الدين تجديد = جاء في صحيح الترمذي و البخاري