عيدنا هذا السّنه جالنا نصّ ارمضان=فرحةٍ ماتنوصف بالمشاعر والقصيد
في خروج الاحمدي من سجنّ طوّل وهان=ربّنا فرّج عنه ذلك الهمّ الشّديد
لنّ للمومن نصر لو تحيّر بالأوان=ومن صبر يلقى فرجّ للمسرّه يستعيد
وطالب الله مايخيب لا دعا بعد الأذان=لا رفع كفّه دعا ربّنا ماهو بعيد
يامحمّد ياسميّ المبشّر بالبيان=عاد عيدك بالفرح شوفة امّك يوم عيد
والضّروف القاسيه للرجاجيل امتحان=تظهر الرّجل الكفو تكشف الشّخص البليد
وقدّر الله عاينك لجل تبشر بالامان=صخّر اهل الطّيب والله يفعل مايريد
ويشكر الله سعيّ ناصر بجهده ماتهان=فزّع العربان لجلك بفعله والنّشيد
بالحميّه يتّصف متّخذ طيبه حصان=قام يسعى فالقضيّه وربّه له شهيد
شدّ حيله بعد ماوكّل الله واستعان=ياعسى عمر الحساني بالسّعاده له مديد
والمجالس دورها دور واضح للعيان=جمّل الله حالها وانت منها مستفيد
اعلنت بوقوفها جانبك دون امتنان=ومن يقود اقطارها قام بالعلم المفيد
وابن عسّاف الكفو شيخ في ربعه مصان=سرّ ربعه ماقفه والمواقف له تشيد
خالد محمّد علي معتلي قدر ومكان=شيخ يملك معرفه تظهر الرّاي السديد
وابن عيّاد احموي بان شانه خير شان=يمتلك له همّةٍ تهزم الخصم العنيد
عزوتك يابو حمد نصرها نصر ٍيبان=نارها حيّه وتصهر لها صلب الحديد
وبارك الله فالرّجال الزّبيدي والعوفان=والسّحيمي ينشكرّ من عرف مثله سعيد
يالله انّك زيدنا جاه هي هذا الكيان=وعادة ٍفي حرب نار الحميّه تستقيد
قالها شاعر كفو يمتلك سحر البيان=ومن نسينا نذكره يقبل العذر الاكيد
والصّلاة والسّلام عدّ نبت الزّعفران=في ختام القول صلّوا على النّور التّليد