من يوم أحطت العلم لين اليوم أنا يافع يفيع=ياكثر ما نسمع بهالهرجه على طِيِب الذِكر
"ذكر الحيا والطيبين يبين" ؛ ولا جالك يشيع=يبين ذكر الطيبين ، ومن إيحجبه ما قدر
حيث الحيا والطيبِ في ذِكره ومفعوله سريع=ذِكره كما النور المنير ومن يبي حبسه ظهر
وأخذت انا ليه سنين واشهر وألحِقها أسآبيع=قالوا ليه اوعشموني _لين ما مل الصبر_
عن الفتاه اللي تبي تغني اهلها والضجيع=لكنها هاك السنين يقال ما بِلغَتْ عشر
قالوا لي ما يعقل ولا تقدر ولاانته مستطيع=ما انتا مقاوم في جمال الحور والطرف الحور
فإذا عرفت لدربها تبشر بها ، واصحا تتيع=واغيب لا مني سمعت اوصافها مدري آحضر
قالوا يشاف بساقها مخ النخاع _أو النخيع_=ويُشاهد الماء مع نحرها كلما تشرب حدر
وأنا إن تخيلت المفاتن ألزم الدرب ويضيع=لا أنا قدرت وصلها ولا تحراني عمُر
قدام يجيني طيفها لن ما هجعت امع الهجيع=زل العشا التالي ويلحقه السحر ثم السفر
حتى أرّهَقَتّنَا بالاماني والشبع لحق الجويع=وانتَ إن شربناك البحر وانتَ إن رقدناك الضجر
ايه انت ياللي في زمَنَّا والحياة ؛ حسبت شفيع=الله ياحنا عليك امعلقين أجمل فخر
انت اللي من اول تقول الوضع ذا جداً فضيع=ماغيرتك ألا المنازل ، اللي إتْغيِّير فالقمر
يامنوة اهل الصبر وياسلوة هل العشق الصريع=يافزعة اللي عذبنه بالنواهي والامر
صارت سمه منك الكأبه من جفافك فالربيع=امنول ابساطك خضر واليومه ابساطك حمر
حنا أيقضتنا احلومنا ألا أحرمتنا يا الشجيع=ذرت لنا ملح العيون أُعمي البصيرة والبصر
من وقتنا مات المريض وشاب فالوقت الرضيع=وش عذري لصياح الثكالا ، كيف أبا ألقى لي عذر !؟
حنا جسد واحد وانته منتا امتعذرنا جميع=باقي الجسد متى تداعا له بالحمى والسهر !؟