كل مااتصل بي قمت اهلّي وحيّيه=غلاه ماله وصف واطرب لحسّه
ماملّ منّه كان طوّلت احاكيه=صوته كما فنّان يتقن مجسّه
واتعب ولااحسّ التّعب يوم باجيه=وقبل الوعد لازم طريقه نعسّه
من خوف يدري واحد ٍ ماندانيه=يخرب لقانا جعل ربّي يطسّه
وياللي وعدّ وعده معايه يوفّيه=ياالله عسى عين الحسد ماتمسّه
وعين المها ياويل منهي تراعيه=ينصاب مايعلن من الودّ بسّه
الودّ مانقدر عن النّاس نخفيه=لو كان حاولنا عليهم ندسّه
الشّوق لك فاضح وتظهر شواريه=والوضع بيّن دون لحد ٍ يجسّه
عزيز شامخ للوفا مانوصّيه=راقي وكلّك ذوق مافيك خسّه
هذا شعوري في حروفي لك ابديه=وعندي خبر بشعور ذاتك يحسّه