الرّزق عند الله عدله قسومه=لاكن نسعاله وناخذ بالاسباب
وكلا ً يبا يسعى يحقّق حلومه=ويرضي طموحه دامه الرّاس ماشاب
وخذّ قصّة مواطن عسى ماتلومه=كافح بعلم ٍ زين ماهو بنصّاب
لاكن كفاحه مامحاله همومه=في وقت يطعم شهد لانسان لعّاب
مسكين حضّه ماجلب قوت يومه=في موتره لفلف ولاشال ركّاب
ماغير راكب ماتسرّه هدومه=شاله وحطّه دون لاياخذ احساب
وإذا لقا راكب يسدّد لزومه=ياخذ قسيمه مدبله كل ماجاب
بعدين روّح يبسط بجحّ كومه=في موتره مجموع باخضار واعناب
في درب كثر اجناس فيها زحومه=وجاه المراقب يعطي انذار بخطاب
ليت الامانه بالمواطن رحومه=اسم ٍ بلا مسمّى ولا يكسب اعجاب
انظامها ياخوك مكثر رسومه=ياخذ ولاينفع ورى الرّزق طلاب
واليا دخل لسّوق قصرت عزومه= مادام حكم السّوق في يدّ الاجناب
ودّه بقاله تعطي الحض ّ قومه=لاكن راس المال واجد وغلاّب
عاش البطاله عاف زاده ونومه=لنّه بدا ينعاف باصحاب واحباب
شحّ العمل في فرصته طال صومه=دام العماله فالبلد ضدّه احزاب
ولو يشتغل بالفين ماهي خدومه=هذيك تخدمّ من تناديه( بيساب)
كل شي يافوّاز زادت سهومه =وماهو لمطلوبه بالالفين جلاّب
ولو هو شكى شكواه تاصل خصومه=ولاضنّ فيه انصاف والخصم كذّاب
والوقت يافوّاز كثرت رخومه=قلّ الشّجيع اللي ينومس للاقراب
كم ناس ضدّ الشّعب تكره قرومه=تمسكّ مناصبها وتقرصّ كما الدّاب
ومعلوم ابو متعب ّ تنومس علومه=لو هو درا عنهم يضرّبهم الباب
جاكم خطاب اللي تشرّف سلومه=وان كانه اخطابه محيّر للالباب
لاتحسبه قصده يعارض حكومه=حلق اللحا ماهو كما حلق الاشناب
حنّا مع آل اسعود حشمه لزومه=نبقى نصون العهد وانكيد الاغراب
ناقف معا ً والوقت نمحي جرومه=ومانقصر المجهود فكفاح الارهاب

يابادع القيفان بحرك نعومه =ونجيب من غب البحر كل ما طاب
وربك رزق وحش الفيافي لحومه=والداب الاعمي رازقه دون مخلاب
والصقر والنغري وديك ن وبومه=كلن رزقها الله باليسر واتعاب
وأشباههم فالناس ماكل طعومه=ولاحِيل دون الرزق لا قِدر احجاب
اللي كتبلك لازم إنك ترومه =مكتوب فالارحام من قبل الانجاب
عن الركاب أو فالسواري امخطومه=أو سير رجلي بين وديان وهضاب
ما تنال غير اللي نصيبك يسومه=ومن دق باب الرزق بالجهد ماخاب
ولاضاق درب اسلك طريق ن يشومه=لوكنت في ورقان بالفاس حطاب
وياسايق التكسي قليل ن غنومه=مافيه لضميان ورد ن ومشراب
عنيت نفسك بعد عشرين حومه=مشوار واحد ماجمع حق الاعطاب
في ما مضى التكسي كثيره نعومه=دايم محمل في ذهاب ن وفي ياب
اجرتك بالعداد تفرح برومه=واليوم لاعداد ولا ركب وازهاب
ممنوع تحميلك وزادو سقومه=النقل في حكر المشاوير نهاب
وحجز المواتر والقسايم صرومه=لظهر .. وان الوقت مايل بمشعاب
وتلقى ولد هنود ينفخ جذومه =يفتل اشانيبه ويرسل لبنجاب
ويرشي ويغشي كل مكسب بزومه=واحنا معاهم مثل مركون الاخشاب
وذيك الامانه بالخيانه نهومه=جده مضت واليوم فتبوك ننصاب
جو الامانه ما صفا من عسومه=دام الهوامير العواتيل نواب
لاترتجي منهم ياكود الغرومه=أنت غريم وحطو من فوقك انصاب
تدري متى سعدك تبارق غيومه=لاكان للمسئول تقيم و عقاب
في حينها المسئول تنتج فهومه=وتلقى المواطن راق ن فوق مرقاب
وحنا ترا نيران حمرا ضرومه=دون الوطن والسيف معزوز بنصاب
ودوم أبو متعب علينا دسومه=ياجعل من يشناه من دنيته غاب
هذا كلامي جاك واضح عمومه=مكتوب من هاجوس ذيب ن من ذياب
حربي ولد مسروح خال وعمومه=وفخري بدين الله ما افخر بالانساب
واعداد مزن جات تبرق ركومه=صلوا على المختار وعموم الاصحاب