لضاق صدري من همومٍ وهوجاس = وحسيت اني من عنى الوقت منحس
خذيتلي مع صحصح البيد مرواس = ياما همومي عن ضميري تحلس
برض خلا مابه ازعاجٍ ولا ناس = الجو هادي لا لجاجه ولا حس
شبيت ناري براس مزموم الأطعاس = لاني بلا خايف ولاني بمندس
ودنيت انا الدله ونجرٍ ومحماس = وزينت فنجالٍ مزعفر تقل ورس
من شفته انزاح من راسي عماس = ويروق كيفي من شقى الوقت والعمس
ابعدت عن ناسٍ حقيرين وخساس = مالي ومال العفن الواطي الدنس
اللي عن الماجوب يعرض ونساس = عن واجبه يصد ابن الرزل نس
ودي معي بالبر برقٍ ونوماس = الكل منهم غشمريٍ وبعد ونس
وابن بليهد شوق لباسة الماس = هداج تيما ماهو قليبٍ رس
رجالٍ على كسب المراجل خذو كاس = ارتاح معهم لو ماملك ولو فلس
==========ردي عليه
اهلا هلابك عد ماهب نسناس =او عد ماينبع من البير والرس
ترحيبة البارق وعابر على الراس=من شاعرن يقراء المواويل ويجس
اللي ذكر عبدالعزيزن ونوماس=رجالن مع الطرقه ولا قالوا تهس
مثل الجبال العاليه طيور قرناس=وانته مثل حيدن قوين ولايمس
شامخ بعز واضحن مثل الالماس=ومن رافقك قالو نبي عابر وبس
حيثك تصون الطيب والعرق دساس=عنك الرد يجفل تهينه ويخرس
وعند المواقف تشبه الخيل ابرماس=والا الردي عفنن عن الطيب هو نس
الطيب يازينه ويشرح للانفاس=والا الرداء علومه هزيله وتنحس
وراع الرداء خوته همن وسواس=ولاترافق اللي ينقل الهرج ويوس
في رفقته شرن وهم و هوجاس=وصفحاتكم بيض مع السلم والفرس
والعذر عن زلتن بالقاف واعماس=وبيتن مخالف للمعاني وبه مرس