ضاق الفضا مدّ النضر من سهوله=يالايميني شاب راسي من الضيق
لو ان مثلي مدرك ٍ مايهوله=مخشى تخطـّــفني رمااحه مزاريق
ياقرب زرع ٍ بالحشا من محوله=لوقيل بانت فيه روس الزماليق
واكبر شرهاتي على من تنوله=وياشين نضراتي لبعض المخاليق
يقبل ظلام الليل يسحب فلوله = القلب لولا قاضبته المعاليق
مافيه نجم ٍ بالسما مايطوله =ولامطبّه كود روس الشواهيق
يحن ثقل الكايده من حموله=وملازمه بالدرب شهب الطواريق
لو مشغل التفكير يصعب حصوله =وكاد مازلنا كمانا عماليق
في كل من ينكر علينا ميوله=ماعادنا يمة لقاهم مشافيق
لو الكلام الفى عليّ امعسوله=متساوي ٍ عندي معه نشفة الريق
في ظل من بالحق باعث رسوله = نرجي عسانا من جهنم معاتيق
ياغيث من حار وغدتبه رجوله=على طريق التيه عقب التوافيق
نفسي على مركب شقاي امحموله =ومغرّب ٍ والناس خلفي مشاريق
رحمتك يامن كلنا في قبوله = رب العباد الفرد غيث المخانيق
برضاه سرنا والرجا في وصوله=لو حملنا بصدورنا مابعد طيق
الكل منـّـا مقفيتبه ذلوله =مهيب من راسي خراص وتلافيق
ترى الفتى لو مارقتبه فعوله=مهو براقي فيه مدح المطافيق
كان الشقا للحرب يقرع طبوله =وقفت له وانا سليل المطاليق
على قدم لين العزايم تزوله=في قدرة الله مالحقني تعاويق
على الولي عثر العسير وبطوله=وقت السحر والا صلاة التشاريق
عليه بث الحزن عرضه وطوله=وبرادته بيبان ضيمي مغاليق
يامدّعين الياس منهو يقوله =ربي رحيم وفي يديه التوافيق