يا ابو طلق قدام لا ابدى الخطابه=وقدام امد العلم وانت تديره
جالك سلامي فوق متن السحابه=يبرق ويرعد ثم يمطر غزيره
يروي عروق القلب لامن سقابه=ويحيي قفار الوصل تالي هجيره
مبداه عندي سايقه ما احترابه=ثم آخره لا عند بابك مسيره
وبعد السلام الي قصيدي بدابه=هذي قصيده جات من بعد حيره
احترت انا في حالي الي تشابه=عزي لحالن مثل حظي مصيره
كني غريب الدار محدن درابه=يمشي لحاله بين ناسن كثيره
همن يشيله فوق متنه سرابه=ما ينعرف تاليه بايات ديره
الحظ واقف ما ارتضى من رضابه=عيني بصيره لكن اليد قصيره
وان قلت ابصبر يا حياة الغلابه=صبري عليّ غصب ما قلت خيره
ضاقت عليا دنيتي من رحابه=عامين ليا فالعنى والضريره
الحق خويك بالسلى عن عذابه=بابيات عذبه بالمعاني وفيره
انت الصديق الي وفالي جنابه=والي بلى صدقان حاله فقيره

يا مرحبا براع الادب والذرابه=والعلم يبقى تحت سلطة مديره
اسقى سلامك قلب واروى ترابه=واحيا زهور الوصل داخل ضميره
حي الخطاب وحي منهو لفابه=حي الذي لجله نحث المسيره
العلم جاني واستمع في جوابه=يا اللي لا صرنا بحيرتن نستشيره
محسوب عندي يا الخوي من القرابه=وآنا معك في كل سهله وعسيره
لا تنشغل بالهم حولك ذيابه=اشر وتبشر لك حزام وذخيره
ولا يضيق صدرك لا تعيش فكآبه=حظك موقع لو يطول مطيره
كلن مسجل حصته في كتابه=الي حياته عسر والي يسيره
احدن بيلقى في حياته ثوابه=واحدن ثوابه يوم ما به عشيره
صبرك على امرك كل شي بحسابه=بكره تزين احوال كانت مريره
غيري وغيرك عايشن في ثيابه=سقفه سما وفراش نومه حصيره
والعاقل الي لامن الضيق نابه=يلجا الى الله بالدعا ويستخيره
ماخاب منهو يا الخوي دق بابه=وانته يا ابو بتال عندك بصيره