دنياك ياابن آدم منازل مبناه=لابدها تِخّلَى وتبقى بأثرها
وهنيْ من هو لابنى البيت علاه=بالسيرة العطرة بيوته عمرها
الطيب والمعروف والوجه والجاه=أسباب تخليدٍ لمن هو صخرها
وعزاه من يأخذ بالاسباب عزاه=من لا يوفقه الولي ما قدرها
مفتاحها ، بالله خوافي نواياه=سبحان من عِلمه يسابق نظرها
وهنيْ من هو لا ورث مجد لآباه=يحفظ عزيز أمجادهم ما دثرها
يزيد مجده مجد ويورث ابناه=يصنع للاجيال التوالي فخرها
لو القدر سبعٍ ويأكل بكلتاه=المؤمنين ارواحهم في قدرها
ومن يمتلي به درب لا سار بخطاه=ما عاد قدم رِجل وأخرى وِخرها
والثوب يقيسه من هو راغب فمشراه=في سوق يبدي درها من تبرها
ودارٍ لحقه القيض وأبعد ثرى ماه=وأيبس خصيبه ثم قَسّى مدرها
لابد ما عقب الدهر يوم محياه=تكاشف بروقه ويمطر مطرها
ولابد من نوٍ يخَضِّرّ بمرعاه=يحي هشيم القاع ويُنبِت شجرها
ويزين مرباعه ويازين مفلاه=تضحك نواويرة ويرقص زهرها
ووِرّدْ الضوامي كسرت الحاض بشراه=ولابد يعرف وِردها من صِدرها
ولابد ميرادٍ على غير مشهاه=ولابد مصدارٍ على غير ما أرهى
ولابد وارد غيرنا ما وردناه=من لا ورد حب وكرامه فـ كُرها
ولابد من يومٍ تيابس شفاياه=ولابد ما يبتل يابس نحرها
ولابد من يومٍ مسِيرَه فمضماه=ولابد ما ياطأ سهلها وعرها
ولابد ممشاة الرجل حسبت ارياه=إما كسبها يوم ولا خسرها
ما كان حكم الله قبولٍ ومرضاه=نجبر مشاعرنا على ما ومرها
وما كان حكم الوالي حنا قبلناه=محيي ما قال الله وسيد بشرها
وما كان في مذهب عرب ما جحدناه=نشهِد موامين الشيوخ وجبرها
وما كان حكم الغير فالحمد لله=حرب العظيمة مبتداها خبرها
نكبح نهارٍ فيه متخاذل اقضاه=العين تبرح دربها مع بصرها
ولابد من يومٍ كثير المثاراه=ولابد من يومٍ طواله قصرها
واجب على الرجال تكريم سبلاه=يوفي مطالبها ويحمى شعرها
لا قاد له ربه خصيمه فـــ يمناه=لحيه ما تافر لحيته ما وفرها
وإن جا نهارٍ شايلٍ داه فرداه=رد العواري بروسها ينتظرها
ردات حرب ومن نسينا عمدناه=هذي وجوب الروح والتَرك شرها