لاهنت يامتوج صـدر جـزل الامثـال=بأصـدق مشاعـر تحتويهـا قصيـده
ماهو طرب / غنيت من ضيقة البـال=يدفعك دين .. وطيب راس .. وعقيـده
وقفة وفاء في كل حال مـن الاحـوال=عليـك يافيحـان مـاهـي جـديـده
ياراس مـال مـدورة روس الامـوال=لك مثلها وقفـات .. ماهـي وحيـده
عزيت حرب .. بطيب الجد .. والخـال=اللي من الدنيا طـوى المـوت قيـده
ووجزت في حكمة عقل .. يابن الابطال=عن وصف ميـزات الفقيـد العديـده
باللي علينـا حقهـا فـال .. وعقـال=وروعة عمل جوهر جسدهـا تجيـده
خلتنـي اجاريـك .. واجـر مــوال=من ضيقـة ٍ حـروة فرجهـا بعيـده
عقب اليقين اللي قطـع كـل الامـال=واللحظـه اللـي عاقبتهـا شـديـده
شيبان .. صاروا وقتها مثل الاطفـال=كـل ٍ يغـص بعبرتـه فـي وريـده
هذا الغياب اللي لامنه حصل .. طـال=ويذوب منـه القلـب لوهـو حديـده
أرفـع كفوفـي معـك لله وأســال=اللـي يـدبـر مايـشـاه ويـريـده
يجعل لحد قبـره بساتيـن .. وظـلال=ويحييـه بالجنـه حـيـاة ٍ سعـيـده