ياصاحبي مابه جديدن ولا شي = غير الهنوف اللي يصافق نهدها
ليا اقبلت تمشي وتفتن هل الحي = راحو ضحايا من سبايب جسدها
تلبس عباية ضيًقة والجسد وي = ومتلثًمه وعيونها امر وادهى
كل مابغيت اجاهد الروح ياخي = تغريني الدنيا واحس بسعدها
ابليس شاطر والعرب زادو الكي = جات الفتن ياويل منهو عبدها
اليوم جده صايره كنها دبي = ولوس انجلوس ماعاد يغري بلدها
حنا العرب مابين دله وكرسي = هذي علوم الكيف واللي بعدها
ذولا قبيلتهم ترى غير عن ذي = كلن يجيب السالفه مع سندها
نجوى كرم تملك عيونن مثل مي = والمنتخب كم صفقتن قد عقدها
ياصاحبي كلن بدنياه لاهي = تبغى الجهاد وديرتك حل فسدها
ياطفال درعه كم طفل باقي(ن)حي = كم ارمله صارت وتبكي ولدها ؟
وافغان حاربهم مسيحي وزنجي = اهل الخيآم اللي ضعيفن عمدها
بروس الجبال الشامخه مابها في = يرسل عليهم طايره ماوردها
واهل العراق اللي عقب موت ابوعدي = مافيهم اللي راحته قد وجدها
وجندي يهودي مقابله الف وشوي = يارخص دم المسلمين بعددها
وياهل المجاعة مالقيتو لحم ني = بافريقيا ذاقو المرارة ونكدها
وين الضمير المسلم الصادق الحي = عسى غيوم الحق يرعد رعدها
واشيب عينك ياصحيبي وعيني = ذي امة الاسلام خايب جهدها
وختامها مابه جديدن ولا شي= احدن شكر نعمة واخر فقدها