سمعت لي بعض العلوم ولاعرفنا كيف جات = الناس شللي صابها حتى اختلف منوالها
مسلم في موت اخوه سوا له فرح ومظاهرات =الموت حق وكل نفس بايجيها فالها
االفعل ذا منكر وحنا مانحب المنكرات = المخطية ماهي لنا والصايبة فزنا لها
دنيا تراها فانية والباقيات الصالحات= واعمالنا ربي بجازيها بعشر امثالها
ان كان صح العلم وين اهل العقول النيرات = الناس مسئولة عن اللي تفعله جهالها
قال المثل عند الرجال اهل الوفا والمكرمات = وقت اللوازم شرهة الجاهل على عقالها
الناس لاجامن طوارفها علوم عايبات = ماتقبل اللي يفعل المنكرفي سد اسبالها
اهل النقا هذا سلفهم والمصايب صايبات =واللا مهابيل الاوادم دايما في اهبالها
حنا فقدنا حر حاسينه لصد المجهمات = خمسين عام وهو يكافح خفها واثقالها
ونقول نايف عندنا مامات لو الجسم مات = الفعل باقي والعرب تذكر بطيب افعالها
والنار حية والنفوس تموت لا حان الممات = والحمد لله قافلتنا حاضر جمالها
والشبل من ذاك الاسد والوصف من ذيك الصفات= كل الامور مدبرة تمشي على مجدالها
الحكم من دونه هله مثل الجبال الراسيات = والمملكة مثل الاصيلة والملك خيالها
هذا هو فعل الصقور اللي تصك النايبات = مهما يجيها من عواصف ماتهز جبالها
كم واجهوها من شدايد واثبتوا للمعضلات = ماهمهم حجم النوايب دقها واجلالها
والله يلولا اخوان نورة ناقلين المرهفات = مايستتب الامن في دار وسيع جالها
خذلك من الماضي عبر واحسب حساب المقبلات = المقبلة بالخير قابلها وعيش اقبالها
من قبلهم شعب الجزيزة كلهم راحوا شتات = كم نفس تذبح دون عانيها ودون اموالها
قبايل متناحرة واحزاب في كل الجهات = واليوم حنا اخوان في خيمة يظل ظلالها
وان كان تبغى تعرف انت بخير خذ علم الثقات =مد النظر يم اليمين وثم لد اشمالها
ثنتين تكفي غيرها لو قل مافيه التفات = الامن والصحة مكاسب والعرب تسعى لها
صحة بدن وامن الوطن في دارنا متوفرات = والفضل لله والحكومة ماحصينا افضالها
يامشتكي لاتشتكي لا تلحق الدولة شمات = تراك في نعمة وغيرك لو تعب ماطالها
لنا على الدولة حقوق وللحكومة واجبات = من قام بالواجب وطالب في حقوقه تالها
يالله يامحصي الكواكب والطيور الطايرات = انك تعز الدولة اللي نفتخرباعمالها
قلته وقول الصدق واضح والدلايل بينات =اقول والاقوال محسوبة على من قالها
يالله ياللي مطلع بالبينة والخافيات = عالم خفايا الناس طيبها على بطالها
يارب تهدينا على درب الهداية والثبات = ناخذ سمينات العلوم ولا نحب حثالها