المشاركة الأصلية كتبت بواسطة بيان الصمت

ترفق يا هجوسي ذا زمان الصبر والكتمان=زمان الشك والحيرة وفرض الصمت ميزانه
ترى سرب الحقوق يمرّ لك من مورده ظميان=تروّى من ظماه ويستقي من عد نّكرانه
وغاب النور عن علمه وظلمة ليله التبيان=خطيبه بالجهل يهذي وموت العدل برهانه
بسوقه كلّ شي يغلى ورخصه قيمة الإنسان=خسارة فيه راس المال وربحه زود خسرانه
على موج المصالح تنبني دوامة الخلان=ومركزها محار الموت بين صخور مرجانه
وفيه العز ما يذكر سوى في عالم النقصان=ومن يقرا لتاريخه تمنى علم نسيانه
وغاب الصدق عن أهله وكذبه عانق السلوان=تسلّى به نفوس الغي ترضي كبر طغيانه
كريم الأصل ما يرضاه وعزّة نفسه السّجّان=يفضّل سجنه المظلم لمشهد خلف بيبانه
قناعاته توقّيه الفتن من آخر الأزمان=ولكنّ البلايا تطلبه من بين خلانه
تعلّى بالردي وقته ينافس جملة الأعيان=وصدَّق كلّ ما يسمع وصار الكبر عنوانه
وصار الراي للأدنى ومبدا خلفي الطّوفان=وشيطانه ورا الإعلام لفّه داخل اردانه
على صوت الثّكالى مستهام فحفلته طربان=أبد ما ينبت الإحساس بعد ان مات إنسانه
لجل دنياه حفّت به ثعالب تنكر العرفان=على ضوّ النوايا تستبين احساس بركانه
له النفس الشقيّة بالهوى كم تخلف الأوزان=ولا يدري بها إلا إذا ما انهارت اركانه
بنى من هالة افراحه بروج بحانة العصيان=على حزن الأمانة يستمع من كاذب الحانه
زمانك يا خلي البال حده آخر الأديان=وشر الخلق واخرهم تنسك درب شيطانه