النفس ماهي بمعصومه عن الزلًه=لوكان يومي عن الزله نحذرها
لابد عد الخطا ترده وتاصلًه= حكمه من الله ولانقدر نغيرها
أحيان منا الخطا يصدر ونفطن لًه =وأحيان زلة لسان ولاننيرها
اللي جهلها عسى الخلاق يقفرلًه=واللي عمد كسرها لازم يجبرها
والعاقل اللي حكيم وعقله يدلًه=من غلطته يستفيد ولايكررها
كل الحصا اللي على دربه يعثرلًه=يجمعه واجمل بنايه يعمرها
ياقلب شيل الهموم وخلها فلًه=واللي صغيره دخيلك لاتكررها
مافيه داعي تشيل بداخلك علًه =الحسد والبغض حاجه ماتصورها
لوتخلط النيل كل من يشربه ملًه=وأثماره اليانعه تفقد مناظرها
ياقلب سامح ومن جاملك جاملًه= اللي تساير لزوم إنك تسايرها
والناس بالطيب عاملها وبالملًه =ماتقدر الناس غير اللي يقدرها
وصاحبك واجب عليك إنك تحملًه=إن ماتحملت صدقانك بتخسرها
ولاكل ماتسمعه باذنك تعاينلًه=كم واحد(ن) هرجته ماهو مذمرها
ولاتاخذ علوم من هو صب لك دلًه=تعبان فيها من البارح يبهرها
خله يروح وعلمه ماتحصلًه=نتف له الريش ف يدينه وطيرها
واللي ثقيل(ن) دمه حذرى تقابلًه=النفس خمسة ثواني لاتكدرها
العمر مره وعيشه في فرح كلًه=مادام تقدر صفاها لاتعكرها