المشاركة الأصلية كتبت بواسطة سالم العرم

=




=




=

عز الله اني لي على اصحابي حقوق واجبات = واشره على اللي ما يكمل للرجال حقوقها
عدى شهر مافيهم اللي قال لي الشر فات = يوم المخيله خيلة برعودها وبروقها
وقمت اتذكر بالرخاء يوم انهم سكر نبات = وضحكاتها اللي تدحم بسنونها وشدوقها
وفقدتهم يوم ان عيني حاربت حلو المبات = في ساعتن عندي غياب الشمس مثل شروقها
عز الله اني ما حسبت ان العلوم الاولات = تجي وراها علوم تحرفها وترخص سوقها
يالمجلس الغالي ترى ما رحت من عندك سكات = حتى تقول ايدين خلق الله دون حلوقها
ماني ترى عابر سبيل اللي حياته والممات = متشابهه لصار تحت الارض وإلا فوقها
اجيك واسجل حضوري صدق بالاسم الثبات = واقف بوجه اللي تشيل الحقد وسط عروقها
ناسن تجي متجمعه وتروح بأمر الله شتات = تطمع ولكنا خذينا ضانها مع نوقها
واواسي الاصحاب لصارت عليها معضلات = وافرح لفرحتها واقدرها ولا ارضى عوقها
صحبة وفاء ماهي بصحبة مصلحة ومجاملات = ماني بطمعانن بخبزتها ولا مرقوقها
قصة من الواقع شرحناها بدون مقدمات = والسالفة بين الرجال لها مجال يسوقها
لعلها تاصل اليا روس الجبال النايفات = حتى الحرار الشقر لوحتها تتل سبوقها