السلام عليكم ورحمة الله وبركاته
.
في ليلة زواج اخينا وابن عمنا ياسر سعدون البشري
دار هذا اللحن بيني وبين اخي واستاذي ردة الله بخيّت العصلاني
ردة الله العصلاني=
سلام والمشتكي جمـّال = تاجر وغرقان في دينه
يندب حظوظه على الاطلال = والليل يدعي محبينه
ابو طلق=
ترحيب واهل الجمال رجال = والدين لابد موفينه
لا تندب الحظ يالوبـّال = الليلة الجو يا زينه
ردة الله العصلاني=
عسى البقى وانشراح البال = والقن عندك موازينه
واقف بلا حل أو ترحال = فالقيد طالت به سنينه
ابو طلق=
يا صاحبي ياعزيز وغال = حسّـك شغل حس مغلينه
عطنا مفاتيح للأقفال = ولاّ نكسّـر كوالينه
ردة الله العصلاني=
سابع سنة من سنين طوال = متهوم ما بان مايدينه
دم ولحم في قساوة حال = صابر ولا حلّ في يدينه
ابو طلق=
الانبيا ذاقوا الأهوال = والظلم كانوا مقاسينه
لا تِجْزعه قسوة الأحوال = كل شي مكتوب في حينه
الوبّال : راعي البل.