أعداد مايمشن وماسار( ن)النوق=واعداد ماجادت مزون(ن)مهاميل
سلام ياعزوت(ن) كلها ذوق=يالابتي ياهل الوجيه المقابيل
من مجلس(ن) أسس على ساس موثوق=صرح الأدب محمي عن القال والقيل
ترحيبت(ن) تصدر من أعماق خافوق=للاحمدي راع الكرم ذابح الحيل
واثني بهلا ترحيبت(ن) كلها شوق=ومعطرة من ريحة البن والهيل
لملفى الشيوخ اللي لهم عندنا شفوق=ومن دونهم نشرب مرار الفناجيل
من منتدى يشهد له الكل مرموق=مجالس(ن) ما تعتريها عراقيل
شامخ بربعه من وفيين وصدوق=ولم الشمل هو غايته والمحاصيل
نظمت أنا شطر القصيدة على اللوق=وعجز القصيدة ناظمه دون تظليل
كلاً على طرقه طرق درب وطروق=يامسهل العسرات عليك التساهيل
الله وهبني بالجزيلات منطوق=والبيت له ساس (ن) وللحرف تحليل
أنا أحمدي ولي الفخر هامتي فوق=وبالشعر أمثل عزوتي خير تمثيل
زود الغلا يجري مع الدم في عروق=بني حمد نفخر بها جيل ٍ بعد جيل
يالابتي والمجد ورث(ن) له نتوق=بالواجبات اللي عليهن دواليل
بني حمد لابه لها العز معشوق=حلالت القالات عدالة الميل
حب الوطن حق (ن) وللقاده حقوق=سمعاً وطاعة في المواقف وتكميل
درب (ن) مشوه جدودنا نمشيه بوثوق=مجدن وقدر (ن) ماتنوله مناويل
مجد(ن) مؤرخ من قديم ٍ ومرفوق=ومصادر التاريخ فيها التفاصيل
بني حمد ياغيمة ٍ وسطها بروق=يفزع رعدها أهل القلوب المغاليل
حنا رقينا هامة المجد وشهوق=بافعالنا ماهو بكثر الأقاويل
وحنا على روس الطويله لنا لوق=أحامده ونذلل الصعب تذليل
يالابت(ن) نرخص لها الروح ونسوق=أرواحنا لحوض المنايا أبابيل
أن صاح صايحنا لنا فعل ويشوق=فخر وشجاعة وخيلنا فاول الخيل
صناديد الرجال ونعطي الفعل مطبوق=لا ثارت الهيجا وعجن مفاتيل
كم واحد ٍ فكوه ربعي من ضيوق=وكم حوض وردو بالخيول المصاهيل
لا من زبنا منتخي يشكي العوق=يقلط على قروم الرجال الحلاحيل
خصيمنا من طارد الموت ملحوق=نسقيه كاس اهل السيوف المصاقيل
يصبر على مر العذابين ويذوق=اللي قرب حد الحصون المقافيل
راع الردى صوته عن الحق مخنوق=وفي سلمنا لهل الوفا ندبل الكيل
منهو زرع طيب(ن) حصد نتجه عذوق=وراع الردى زرعه في جدب المماحيل
درب النقى واضح ولاهو بمدروق=واللي أنعمي لو يلبسونه درابيل
مايقبل الهزلات وافي وصادوق=الراس راس وكل خبل (ن) ترا ذيل
الكذب شمسه مالها شعاع وشروق=والصدق نوره ماتحجبه مخاييل
لعل قلب(ن) طبعه الحسٌد محروق=يقضي حياته غارقن في البهاذيل
ولعل رجل (ن) طبعه البخل والبوق=يُبكى عليه من الدموع الهماميل
يالله دخيلك من بلا كل مصفوق=ويارب تكفينا شرور المهابيل
واختم كلامي بالنبي خير مخلوق=المصطفى محمد ختام المراسيل