سميت باسم مكوِّن الكون سبحان=محيي العظام ونافخٍ بالجسد روح
هو واهب الهيبة نبيه سليمان=وحكم النجارة واهبه للنبي نوح
بسماه للمؤمن حماية عن الجان=وتوبة خطأ عبده لها الباب مفتوح
وأباأجتهد وأصيب وأخطي وأنا إنسان=وخطاً ماهو مقصود بالعذر مدموح
وكان القبيلة قلب والشاعر إلسان=مشاعر الشعّار بأمجادها شحوح
كم شاعرٍ فكره بالإبداع مليان=وحلقه على تجريح الأمجاد مبحوح
مادام مالفّوا على الجسم الأكفان=والله لأشيد بمجد الأجداد وأبوح
ما أرضى يقال غليص وإلا إبن برمان=وأنا أعتزي عزوة (سوالم ومسروح)
عزوة لها في قمة المجد عنوان=حربي وترهب عزوتي كل طحطوح
بفعلٍ مضى له قبل الآمان برهان=وقولٍ بلا برهان .. ضحضاح ويزوح
مدوّن البرهان في كل ديوان=بفعلٍ يزيح جروح ويغمّق جروح
بشلفا ورمح وخطام وسنان وعنان=وقول وفعل ماهي سواليف ومزوح
سقنا العدا سوق المثيرة لربان=والحي ما رد النقى بثار مذبوح
تاريخنا حافل بسيات وحسان=منّا ولنا مجدٍ ينابيعه تفوح
تذن به الشيبان باسموع شبان=ولامات من فعله بذكراه ممدوح
إلنا ثلاثة ملك مامثلهن كان=نفدا الخوي والجار بالمال والروح
ونآسم عصا العاني علشان مايهان=وبسلمنا دم النقا فيه مسفوح
وإشهودهن بالصك شمر ومطران=حتى نقول العلم مقفي ومنطوح
وفي قارة الأسلاف شيِّد لسلفان=بيتٍ ذرى وظلال عن كل لافوح
(إبن نحيت) ليا اعتزوا فيه صدقان=خلَّى المشوَّك في دجى الليل له ضوح
يبشر بعز من إعتزى باسم( مزنان)=نسوان عدوانه زغاريدها النوح
أحفاد من للمصطفى أصحاب وأعوان=واِلهم مع الهادي غزوات وفتوح
(ويوم إِنَّ) نجد لقرَّح الخيل ميدان=كم حد ممنوعٍ لنا صار مسموح
(شريدة الفرسان) والسيف فسقان=كم عين طمَّاع كَحَلها بذرنوح
ليا أومى بدس الطير راحوا شبختان=له عزوةٍ يرهب بها كل مشفوح
( ومحمد أبا الرووس )كم راس طمعان=بحد اللويصق عن تراقيه ممسوح
فعلٍ يسمى به هكااليوم لَلآن=ذكره مع أهل المجد ماهوبمسنوح
(ومجوّز العزبان ) زيزوم الأضعان=لولا الفعل ماجاء له الأسم ممنوح
من رافق (سعيّد) رجع معه كسبان=ماقالوا (الذكري) رجع مثل مايروح
ووثايق التاريخ بإسم (المضيان)=لولا (ولد موسى) تعرَّض لساموح
ولولا الحقايق ثابتة لأهل الشان=رجع بها( فايز ) على حرب مكسوح
ماهو تنبِّي للحدث مثل كَرَّان=جاب الخبر من يوصله عزم وسبوح
بدلايلٍ مادلّها كل شرهان=قص الأثر للذاهبة مبعد الشوح
وإقتادها قود المطايا بالأرسان=ويالمبصر إقرأ ! ويالعمى تابعه وأوح
مدونِه للي للأمجاد ضرمان=بعذب الشراب وزاد ميدم ومملوح
وياللي تقول بمااحتوى ماني قنعان=إفزع ولا أقول الخطرعنك مطروح
أما يجي مفزاع قابوس لعمان=وإلامثل فاروق والموج واللوح
للطايرة ( كبتن ) وللسفن قبطان=ولاجاب جوهرْة البحر كل سابوح
ورعيةٍ معها جنبها ورعيان=وشهودها بأفعالها شمَّخ تلوح
والهاملة ماخلّصت دين ديان=ولا يقتعد راسٍ على الزيف مسدوح
وبيتٍ بَلا بيبان لو فيه سكان=الباب عن صلف الهواء فيه مصلوح
قلته وأنا بتقصير تعبيري مدان=مير القريحة وقَّعَت في صفا صوح
والشعر له نقّاد تعبير وأوزان=وماقل دل وزبدة العلم منضوح
وإليا اعتبرتوا غلطتي كبوة حصان=من عفوكم ياأهل الوفاء الصدر مشروح