يا ناشد عني فدوك المطافيـــــــق
إمنين أنا واصلي من أي القبايـــل
أنا الاصيلة مالحقني ملاحيـــــــق
أصلي وفصلي ما يبي له دلايـــل
عندي ثقة بالنفس لا بالزباريـــــق
متزينة بفعول أهلي لاوايـــــــــل
كلي شموخ وهامتي تاصل طويــق
لاقيل بنت فلان زين الفعايـــــــــــل
صرٍحٍ يعرفه من يعرف الشواهيق
واللي جهل بالنايفة لايسايـــــــــــل
عون القصير ومدهل للمطاليــــق
تلقى على بيته سراة القوايــــــــل
الياء هرج يجلى عن الخاطر الضيق
وإلياء فزع يشف النفوس الغلايـــــل
وإلياء عطى عطاه ماهو لماصيــــــق
من مدته يروى يبيس البلايــــــــــــــل
يوف العهود ولا يخون المواثيـــــــــق
كلامه أصدق من حقوق المخايــــــــل
عشيق للعياء ماهو بأي عشيــــــــــق
لايابعد عشق الكدش والجدايــــــــــل
اللي يحسب المرجلة بالخماليــــــــق
وحلق اللحى وملونات الفنايــــــــــــل
الله خلقهم مثل باق الخاليـــــــــــــــق
وأعطاهم العلم الصحيح الصمايـــــل
إجنبونه من ردات التوافيـــــــــــــــق
لاوأخسارة يا عيال الحمايــــــــــــل
سايقهم الشيطان سوق المواسيــــق
للذل والفتنه وخبث الدغايــــــــــــل
بين الغلط والصح مافيه تفريـــــق
يمشون درب الهون لو به ذلايـــل
سدوا عليهم يا الولاة المناطيــــق
وحطوا لهم رادع بكل الوسايـــل
::: شموخ الأصيلة ::: |