في داخلي ضيقه وثوره وإنقلاب=وفي خارجي لمقاوم الفتنه رسن
ينفك باب وينقفل عشرين باب=حتى الاماني في مهدهن عنسن
وهقوات نفسي بالغه حد النصاب=ماكنهن في معهد (الخوف) إدرسن
صار الخطأ في خاطري مثل الصواب=وافراح عمري كل ماقمت إجلسن
طفت اربعين ولاجنيت إلا العذاب=تايه مع الاحزان وظروفي قسن
الوقت طاحني على ضرس(ن) وناب=واسناني اللي في جمايه سوسن
إلى متى بطرد ورى ذاك السراب؟=وإلى متى بذكر آمال(ن) نسن؟
وإلى متى يبقى السؤال بلا جواب؟=وإلى متى بصبر على اوهام(ن) رسن؟
وإلى متى والغيث في غر السحاب؟=واغصون قلبي جف ماها ويبسن!
ثلاث حاجات(ن) تجيب الإكتئاب=الفقر والوحده ودمعات المسن
وثلاث حاجات(ن) يردن الشباب=المال والبنون والوجه الحسن
صحيح بي ضيقه وثوره وإنقلاب=لكن معي لمقاوم الفتنه رسن!!