الهاب الحربي
يالسحيمي ترى بيني وبينك حدود
كل واحد على حده ويرجع وراه
انت حدك من اطراف القصيم وتعود
والوسيدي مسك حد الشمال وحماه
صياف الحربي
انتبه للجمال تسوق ولا تقود
كل جمـّـال ياخذ بندقه مع عصاه
حدي الشام والبصره وعندي شهود
وانت احفظ كتابك والقلم والدواه
الهاب الوسيدي
لا تضيع العلوم ولا تبيح السدود
سوقها لين ياصل علمنا منتهاه
مايقفي نهار الكون غير الشرود
كل ماكبرت الهوشه عطاها قفاه
صياف الحربي
امش يالهاب والهاب الركود الركود
وانتبه للفقير اللي غضب من عشاه
وامسك الارض يالين المسافر يعود
والبنادم ليا جاب العشا ما علاه
الهاب الحربي
يامدير الخزانه لاتروح النقود
في نهار يصير الفقر مثل الغناه
جيت ابا زعل على صياف والياه عود
مير قولوا لابن عواد يصلح خطاه
صياف الحربي
فيه ذيب يغير وفيه ذيب رقود
وانت حط العشا با القدر قبل تغطاه
ليلة السبت تنظر في شرار الزنود
والحقيقه لبست الثوب فوق العباه
الهاب الحربي
الذيابه سوى من عهد عاد وثمود
غير واحد سنونه طايحه من جماه
حرب دايم علمهم فوق راس العمود
اذهن الداب يوم انك قلبت الحصاه
صياف الحربي
الرجال الكبار تحك عود بعود
وانت مدري تحك العود ولا اللحاه
حرب قوم الحرابه قبل عشرة عقود
دارهم مايموت ولا يظلم سماه
الهاب الحربي
الرجال الكبار مقيده بالقيود
مير صياف بن عواد هذا بلاه
بعض الايام بيض وبعض الايام سود
وانت مدري تحب الموت ولا الحياة
صياف الحربي
ما يسب الرسول الا عيال اليهود
وانت روح وتوضى قبل وقت الصلاه
احترم في يمين الضلع وارقى سنود
وانتبه لرماه اللي وراها رماه
الهاب الحربي
انت مانت برسول ولا نت رب معبود
شاعر يخدم الميدان بين زملاه
هيه ياللي تشب النار زيد الوقود
السحيمي نويته كان ما الله هداه
صياف الحربي
اشكر الله يا حربي واشكر ابن سعود
واترك اهل الشعر كلا على مستواه
مايغش الزمل غير البعير الهيود
يوم شم الهوى يهدر ولا له لهاه
الهاب الحربي
نشكر ابن سعود وكلنا له جنود
مير انا شاعر آقف ما قفي وآحماه
مايشيل السلاح الا قوي العضود
وانت ياللي جرحت الجرح تلقى دواه
صياف الحربي
انت تشكر ولا تكفر ولا انت بجحود
مير ماكل طحانٍ يحرك رحاه