المشاركة الأصلية كتبت بواسطة سعد المحمدي

رباح شيال الثقايل فقدناه = مغيبته ياطولها من مغيبه
رحل من الدنيا عسى الخلد ماواه= (حطو على قبره طويل النصيبه )
مرحوم ياشيخٍ كثيره مزاياه=يحل عسرات الامور الصعيبه
ان كبرت القاله هل العرف تنصاه= يطري على من فيه حلت مصيبه
بين القبايل له مكانه وله جاه =حكيم خصمه بالمواجه يهيبه
يمناه في جزل العطايا مضراه =على هديب الشام ماهي غريبه
ياليت قبل الموت بالدار زرناه =لو كان ماداري لداره قريبه
بين القصيم وبين دارٍ سكناه =تطلع علي الشمس غرب القليبه
من ذكر كساب الجمايل بكيناه = دمعي على خدي تزايد سكيبه
نبكيه لو بالعين ماعمر شفناه =قلبي على الطيب جروحه عطيبه
حيثه ينومسني بفعله وطرياه =ان قام كلن يفتخر في قريبه
يالله تغفر بعد موته خطاياه = يارازق الداب العمى في شعيبه