الله من قلبً همومه تغيضه=ومشاكلً دارت طويلات وعراض
من زود مابه بيح الوجد فيضه=وفيض المشاعر ينتحيبه ليافاض
والدمع من عينه يشادي وميضه=وميض براقً من الوسم قد ناض
سيله جرى بفجوج نجد العريضه=وفرحوبه البدوان من عقب مقياض
ياليت نفسه في لقاهم حضيضه =وماراح بالايام ماظن ينعاض

ناح الحمام وصحت بالصوت مشتاق = وسج الخفوق وجاوب النوح بالنوح
انوح من شي(ن) طوني بالاعماق = اللي دمر حالي على غير مصلوح
كم واحد(ن) صابر على غير ماطاق =مير البلا كثر الصبر يزهق الروح
الشوق في قلبي غدى يحرق احراق= وراع الهواء لو يكتم السر مفضوح
يبين في عينه ملامح للاشواق =ويساير العالم ولاوده يبوح
ويسهر بليله ينتظر شمس الاشراق = وكم واحد(ن) في عالم العشق مذبوح
ويالله يامقسم على الناس الارزاق = تفرج على اللي من عنا الود مجروح
ونشرب ونروى عقب يبسن الارياق =ولاعاد اجاوب نايح الورق بالنوح