يامن لقلب لاهب الشوق كاويه=كنه على جمرن تطاير رماده
اليا نعس صوت الكوايا تصحيه=وليا رقد مايهتني في رقاده
على وليفن بيَد الله مساعيه=يبي الوصال وحال دونه قراده
لاحت بروق الصيف لحظت ضحك فيه=وقفى وقفت معه كل السعاده
اليا مشى كنه يحسب خطاويه =واليا التفت خطرن انعبده عباده
عنق المها ماظن غيره يحاليه=وعين العديم اللي ينومس هداده
والوجه ضيه يجهر اللي حواليه=بدر الدجى ينشد عن اللي يشاده
وابو جديل الليل متجمعن فيه= ياخذ من اطرافه سواد لسواده
كنه على مايشتهي جاد معطيه=او ان ربي نزله في عباده
من جنة الفردوس حطه باراضيه=يوم العباد اخطو طريق العباده
تشويق للجنه وذكرى وتنبيه=حتى يزيد المجتهد في اجتهاده
والشوق لوحاولت لايمكن اخفيه=واضح بوجهي مثل ختم الشهاده
ياليتني ماجيت يمت مفاليه=ماصرت ادور للمحبه عياده
ولو كل من يطلب تحقق مناويه=ماتبيت في صدور الرجال النكاده