سلام يا اللي محرق اليوم دمك = يا اللي تبسم لو فؤادك حزيني
احلى سلام وغاية الهرج يمك = وقت(ن) يشين اليوم بكره يزيني
اضرب على الكايد ولاأحدن يهمك = اعرف ترا الدنيا تزين وتشيني
شخص(ن) مدحك العام يمكن يذمك = لا صار ما يحمل بقلبه حنيني
أحذر عدوك لوعلى الصدرضمك = والحق واضح والسوالف تبيني
لا تربط الدنيا على اطراف كمك = دنيا زوال(ن) والملا راحليني
وانت تشيل هموم غيرك وهمك = ذكرك جميل بحسبة الغانميني
وإليا ذكرت الله ترا زال غمك = والرب يذكر كل وقت(ن) وحيني