المشاركة الأصلية كتبت بواسطة فهد مطلق السليمي

مالي مزاج أبوح .. وأجاوب النـــوح = لو ناحت الورقا وهاضن الأشجــــان

قلبي من الصكات مبري ومجــــروح =ولاعاد يمديني على شيل الألحــــان

لاكن قرّب وأفتح الدرج للــــــوح = وشيل القلم فوق الورق ياعليـــّـان

وإن قلت جيبه لا تجيبه ومسمـــوح = مانته بعيني يافتى الجود غلطــان

الشعر ياخذني على نية البــــوح = والناس تفهمني غلط يابليهـــــان

أبطن المعنى عن عيون مشفـــــوح = والقى الرزين من العرب تقل شرهان

يبغا كلامي لاتغنيت مشــــــــروح = والشرح للمعنى مذله ونقصــــــان

لاوالله أني لبعد الشوح وأشــــــوح = من ياضع الكلمه على غير ميـــزان

ماني كتابً للمخاليق مفتــــــوح = أنا كتابً داخله كم عنــــــــوان

على الغموض أسلط الضو بوضــــوح = ومن الوضوح أبيّن أغموض الإنســـان

حتى أيش لو أنه من الناس طحطـوح = لاصار مايخشى هل العرف ينـــــدان

وش يجبر العرى على عشبة الصــوح = مادام ماتبقي على الكنس إدهـــان

الله يجيب الصبر ويبعّد الفــــــوح =لو أن صدري كنه أدلال رســـــــلان

أشوف مايزعل من الناس وأمــــوح = من خوف لاتزعل قرايب وخــــــــلان

والي يدوبح عنده العرف مذبـــوح = ومن مات عرفه يطلع إنسان خســران

بالله قولو وش بلا غصنة الـــــدوح = قامت تطرّق كنها غصن رمــــــــان

غضا خفيفه هزها كل لافــــــــوح = وأنا أحسب إن أغصينها شيخ الأغصان

أبديت ماكنيت بيّن ومطـــــــروح = ولا مطول الدعوى على زلـة الســان

المستمع ماله من السرد مصـــلوح = الناس قالو زبدة الهرج نيشــــان

والظاهر أني بترك أصروح لصــروح =وأرتاح من هرجً على غير بــــرهان

مادام حتى لاتغزلت ملمــــــــوح = وشلون لاهاضت نقاريح الأشجــــــان

تعال يابن أبوي والصمت ممـــدوح = وشيل القلم عن مكتبي قدر الأمكـان

الناس تصرف مقصدي قبل لاأبوح = وإن بحت قالو لي هكالشخص غلطــان